करमाळा शहरात डासांच्या वाढत्या प्रादुर्भावाबाबत जगताप गटासह नगरसेवकांचे मुख्याधिकाऱ्यांना निवेदन; फॉगिंग करण्याची मागणी

करमाळा, प्रतिनिधी:-जितेंद्र चांदगुडे

करमाळा शहरात गेल्या काही दिवसांपासून डासांचे प्रमाण प्रचंड वाढले असून, नागरिकांचे आरोग्य धोक्यात आले आहे. या पार्श्वभूमीवर आज जगताप गटाच्या वतीने आणि शहरातील विविध प्रभागांतील नगरसेवकांनी करमाळा नगरपालिकेचे मुख्याधिकारी यांना भेटून शहरात तातडीने डास प्रतिबंधक फवारणी (Fogging) करण्याची मागणी केली.

यावेळी शिवराजभैय्या जगताप (शहर प्रमुख, जगताप गट) व शंभूराजे जगताप (संचालक, कृषी उत्पन्न बाजार समिती) यांच्या नेतृत्वाखाली शिष्टमंडळाने मुख्याधिकाऱ्यांशी सविस्तर चर्चा केली. दिलेल्या निवेदनात म्हटले आहे की, वाढती उष्णता आणि शहरात ठिकठिकाणी साचलेल्या सांडपाण्यामुळे डासांची उत्पत्ती मोठ्या प्रमाणावर होत आहे. यामुळे डेंग्यू, मलेरिया आणि चिकनगुनिया यांसारख्या गंभीर आजारांचा धोका वाढला असून लहान मुले व ज्येष्ठांच्या आरोग्याचा प्रश्न ऐरणीवर आला आहे. रात्रीच्या वेळी डासांच्या त्रासामुळे नागरिकांची झोप होत नसल्याने सार्वजनिक शांततेचाही प्रश्न निर्माण झाला आहे.

निवेदन देतेवेळी उपस्थित असलेल्या नगरसेवकांनी आपापल्या प्रभागातील प्रलंबित प्रश्नांकडे प्रशासनाचे लक्ष वेधले. नगरसेविका सुवर्णाताई आलाट यांनी प्रभाग क्रमांक ६ मधील पाणीपुरवठा आणि नळ दुरुस्तीचा प्रश्न अत्यंत प्रभावीपणे मांडला. पिण्याच्या पाण्याची गैरसोय दूर करण्याची मागणी त्यांनी केली तसेच नगरसेविका अश्विनी अब्दुले यांनी शहरातील स्वच्छतेच्या विषयावर आक्रमक पवित्रा घेत नियमित कचरा उचलण्याची मागणी केली. नगरसेवक युवराज चिवटे यांनी कामाचा वाढता व्याप पाहता नगरपालिकेच्या स्वच्छता कर्मचाऱ्यांची संख्या वाढवण्याची मागणी केली, जेणेकरून शहराची सेवा अधिक कार्यक्षमतेने होईल.

यावेळी माजी उपनगराध्यक्ष अहमद कुरेशी, नगरसेवक प्रशांत ढाळे, यांसह जगताप गटाचे प्रमुख पदाधिकारी आणि कार्यकर्ते मोठ्या संख्येने उपस्थित होते.

नगरपालिका प्रशासनाने या निवेदनाची दखल घेऊन लवकरच सर्व प्रभागांमध्ये, नाल्यांच्या ठिकाणी आणि दाट वस्तीच्या भागात धूर फवारणी (Fogging) व जंतुनाशक फवारणी सुरू करण्याचे आश्वासन दिले आहे.