पुरस्कार सोहळ्यांमध्ये पारदर्शकता आवश्यक; विश्वासार्हतेची पडताळणी करूनच सहभाग घ्यावा

नागपूर : विविध संस्था, ट्रस्ट व स्वयंसेवी संघटनांकडून आयोजित केल्या जाणाऱ्या पुरस्कार सोहळ्यांबाबत पारदर्शकता आणि आर्थिक उत्तरदायित्व सुनिश्चित करण्याची गरज व्यक्त होत आहे. अनेक पुरस्कार उपक्रम समाजातील उल्लेखनीय कार्याचा गौरव करण्यासाठी असले तरी काही ठिकाणी निवड प्रक्रिया, शुल्क आकारणी, परीक्षक मंडळ आणि आर्थिक व्यवहार याबाबत पुरेशी माहिती उपलब्ध नसल्याच्या तक्रारी पुढे येत आहेत. 

सामाजिक कार्यकर्ते आणि नागरिकांनी कोणत्याही पुरस्कारासाठी अर्ज करण्यापूर्वी संबंधित संस्थेची नोंदणी, आयोजकांची विश्वासार्हता, पुरस्काराचे निकष, निवड प्रक्रिया आणि आर्थिक व्यवहारांची माहिती तपासून घ्यावी, असे आवाहन करण्यात आले आहे.

तसेच पुरस्कार सोहळ्यांसाठी मानक कार्यपद्धती (SOP), अधिकृत संस्थेच्या बँक खात्यातूनच आर्थिक व्यवहार, निवड प्रक्रियेची सार्वजनिक माहिती आणि प्रभावी तक्रार निवारण व्यवस्था बंधनकारक करण्याची मागणीही होत आहे. 

पुरस्कारांची प्रतिष्ठा आणि समाजातील विश्वास कायम राखण्यासाठी पारदर्शकता, उत्तरदायित्व आणि नैतिकतेची अंमलबजावणी करणे ही काळाची गरज असल्याचे मत व्यक्त करण्यात येत आहे.