प्रख्यात कीर्तनकारांच्या सेवेने परिसरात आध्यात्मिक दरवळ

  

 

गीता जयंतीनिमित्त  निफाड तालुक्यातील विष्णूनगरात अखंड हरिनाम सप्ताहाची भक्तिमय सुरुवात सप्ताहाचे यंदा ७३वे वर्ष; 

प्रतिनिधी : गणेश ठाकरे लासलगाव 

विष्णूनगर (ता. निफाड) येथे श्री गीता जयंती तसेच श्री ज्ञानेश्वर माऊली सामुदायिक पारायण महोत्सवानिमित्त विष्णूनगर (पाबळवाडी) येथे अखंड हरिनाम सप्ताहाचे ७३वे वर्ष मोठ्या भक्तिभावाने सुरू झाले आहे. २५ नोव्हेंबर २०२५ ते २ डिसेंबर २०२५ या कालावधीत दररोज नामस्मरण, प्रवचन, कीर्तन आणि विविध आध्यात्मिक कार्यक्रमांनी परिसर भक्तिरसात न्हाऊन निघणार आहे.

गेल्या ७३ वर्षांपासून चालत आलेल्या या पारंपरिक हरिनाम सप्ताहाला यंदाही भव्य स्वरूप देण्यात आले आहे. आकर्षक सजावट, भगवे पताका आणि प्रकाशयोजनांनी गावाचे वातावरण अधिकच पवित्र झाले आहे. ग्रामस्थ, महिला मंडळे व युवकांचा उत्स्फूर्त सहभाग विशेष उल्लेखनीय आहे.

मान्यवर कीर्तनकारांची कीर्तनमाला

राज्यातील प्रसिद्ध कीर्तनकार संतवाङ्मय, गीता, ज्ञानेश्वरी आणि हरिनाम महात्म्य यांचा संगम साधत रसाळ प्रवचन व कीर्तनसेवा सादर करत आहेत. २५ नोव्हेंबर – ह.भ.प. मधुसूदन महाराज मोगल २६ नोव्हेंबर – ह.भ.प. पुंडलिक महाराज जाधव २७ नोव्हेंबर – ह.भ.प. उमेश महाराज दशरथे २८ नोव्हेंबर – ह.भ.प. सुनील महाराज झांबरे २९ नोव्हेंबर – ह.भ.प. ज्ञानेश्वर माऊली काकडे ३० नोव्हेंबर – ह.भ.प. जगदिश महाराज जोशी १ डिसेंबर – ह.भ.प. एकनाथ महाराज सदगीर समारोपाच्या दिवशी सकाळी ११ ते १ – ह.भ.प. एकनाथ महाराज सदगीर यांचे विशेष नामसंकीर्तन.

*दररोजचे भक्ती कार्यक्रम*

पहाटे ४ ते ६ – काकडा भजन सकाळी ७ ते ११ – ग्रंथराज ज्ञानेश्वरी पारायण सकाळी ११ ते १२ – गाथा भजन सायंकाळी ४ ते ५ – प्रवचन सायंकाळी ५ ते ६ – हरिपाठ सायंकाळी ७ ते ९ – हरिकीर्तन या सातत्यपूर्ण उपक्रमांमुळे संपूर्ण विष्णूनगर भक्तिभावाच्या सुवासाने भरून जात आहे.

*भक्तिभावाचा दरवळ*

पारायण, भजन, हरिपाठ, आरती आणि महिला मंडळांच्या भजनसेवेने सप्ताहाचे वातावरण अधिकच अध्यात्ममय झाले आहे. भाविकांसाठी आसनव्यवस्था, शुद्ध पिण्याचे पाणी, प्रकाशयोजना आणि शिस्तबद्ध व्यवस्थापनाची उत्तम सोय करण्यात आली आहे.

आयोजक मंडळाने सर्व भाविकांना परिवारासह उपस्थित राहून हरिनाम सप्ताहाचा आध्यात्मिक लाभ घ्यावा, असे आवाहन केले आहे.