सामाजिक कार्याची राज्यस्तरावर दखल; रितेश रोकडे यांना युवा रत्न पुरस्कार २०२६ जाहीर

प्रतिनिधी महागांव अक्षय डोंगरे 

अमनी खुर्दच्या सुपुत्राचा मानाचा तुरा; समाजसेवेच्या कार्याला मिळाली राज्यस्तरीय गौरवाची पावती

महागाव : प्रज्ञा बहुउद्देशीय सेवाभावी संस्थान, भास्कर व्यायाम शाळा व क्रीडा मंडळ यांच्या वतीने दिला जाणारा प्रतिष्ठेचा युवा रत्न पुरस्कार २०२६ सामाजिक कार्यकर्ते रितेश रावसाहेब रोकडे (रा. अमनी खुर्द, ता. महागाव, जि. यवतमाळ) यांना जाहीर झाला आहे. समाजहितासाठी सातत्याने केलेल्या उल्लेखनीय कार्याची दखल घेत त्यांची या पुरस्कारासाठी निवड करण्यात आली आहे. त्यांच्या या निवडीमुळे महागाव तालुक्यासह परिसरात आनंदाचे वातावरण निर्माण झाले असून विविध स्तरांतून त्यांच्यावर शुभेच्छांचा वर्षाव होत आहे.

ग्रामीण भागातील सामाजिक, शैक्षणिक आणि जनजागृतीपर उपक्रमांमध्ये सक्रिय सहभाग घेणारे रितेश रोकडे हे युवकांमध्ये प्रेरणादायी व्यक्तिमत्त्व म्हणून ओळखले जातात. समाजातील वंचित, गरजू आणि दुर्लक्षित घटकांच्या प्रश्नांसाठी त्यांनी सातत्याने आवाज उठवला असून अनेक सामाजिक उपक्रम यशस्वीपणे राबविले आहेत.

विशेष म्हणजे, डॉ. बाबासाहेब आंबेडकर जयंती (भीम जयंती) उत्सव, बौद्ध धम्म परिषद, धम्मप्रसार कार्यक्रम, संविधान जनजागृती अभियान, सामाजिक एकात्मता मेळावे तसेच विविध सामाजिक चळवळींमध्ये त्यांचे योगदान उल्लेखनीय राहिले आहे. भीम जयंती उत्सवाचे नियोजन, युवकांचे संघटन, सामाजिक सलोखा आणि बौद्ध धम्माच्या विचारांचा प्रसार यासाठी त्यांनी केलेले कार्य समाजात विशेष चर्चेचा विषय ठरले आहे.

याशिवाय रक्तदान शिबिरे, आरोग्य तपासणी शिबिरे, गरजू विद्यार्थ्यांना शैक्षणिक साहित्य वाटप, पर्यावरण संवर्धन मोहिमा, वृक्षारोपण, सामाजिक जनजागृती कार्यक्रम आणि विविध समाजोपयोगी उपक्रमांमध्ये त्यांनी सक्रिय भूमिका बजावली आहे. त्यांच्या कार्यामुळे अनेक युवक सामाजिक क्षेत्राकडे आकर्षित झाले असून विधायक कामासाठी पुढे येत आहेत.

आजच्या काळात सामाजिक कार्य हे केवळ भाषणांपुरते मर्यादित न ठेवता प्रत्यक्ष कृतीतून समाजासाठी झटणाऱ्या कार्यकर्त्यांची गरज आहे. रितेश रोकडे यांनी ही भूमिका प्रभावीपणे निभावत समाजातील विविध घटकांना एकत्र आणण्याचे काम केले आहे. त्यामुळे त्यांची युवा रत्न पुरस्कार २०२६ साठी झालेली निवड ही केवळ वैयक्तिक सन्मान नसून संपूर्ण महागाव तालुक्याच्या सामाजिक क्षेत्राचा गौरव मानली जात आहे.

अमनी खुर्दसारख्या ग्रामीण भागातून राज्यस्तरावर पोहोचलेले हे यश अनेक युवकांसाठी प्रेरणादायी ठरत आहे. सामाजिक कार्याची खरी ताकद ही पदात नसून लोकांच्या विश्वासात असते, हे रितेश रोकडे यांनी आपल्या कार्यातून सिद्ध केले आहे.

त्यांच्या या यशाबद्दल सामाजिक, शैक्षणिक, धार्मिक आणि राजकीय क्षेत्रातील मान्यवरांनी अभिनंदन केले असून पुढील वाटचालीस शुभेच्छा दिल्या आहेत. समाजसेवेचा हा प्रवास यापुढेही अधिक व्यापक स्वरूपात सुरू राहील आणि समाजहितासाठी त्यांचे कार्य अधिक जोमाने पुढे जाईल, अशी अपेक्षा व्यक्त केली जात आहे.