“भगव्या पळसाने सजले अजिंठा घाट; निसर्गाने उधळले रंगांचे वसंतसोहळे”

 

 

सातमाळ्याच्या डोंगररांगांमध्ये फुलांचा सडा; प्राचीन लेणी आणि वसंताच्या रंगांचा अप्रतिम संगम

प्रतिनिधी सोयगाव..

दिलीप मोरे...

अजिंठा लेणी परिसरात सध्या निसर्ग एका अद्भुत सोहळ्याच्या उत्कर्षाला पोहोचला असून संपूर्ण घाट परिसर रंगांच्या मुक्त उधळणीने नटला आहे. सातमाळ्याच्या रांगड्या डोंगरदऱ्यांनी जणू भगव्या आणि गुलाबी छटांचा शालू परिधान केला आहे.

अजिंठा घाटातून प्रवास करताना वाटेवर उभी असलेली पळसाची झाडे भूमीतून उसळलेल्या अग्नीच्या ज्वालांसारखी भासतात. गर्द केशरी फुलांनी बहरलेल्या या झाडांमुळे घाट परिसर एखाद्या मंगल सोहळ्यासाठी सजल्याचा भास निर्माण होतो. खान्देशच्या उन्हाळ्याची तीव्रता अजून पूर्णपणे जाणवू लागलेली नसतानाच वसंताच्या पावलांनी निसर्गाला नवचैतन्य दिले आहे.

पळसाच्या भगव्या विखाऱ्यासोबतच ठिकठिकाणी उमललेल्या गुलाबी रानफुलांनी डोंगररांगांना कोमल स्पर्श दिला आहे. पाषाणांच्या भेगांतून डोकावणारी ही नाजूक फुले आणि त्यांच्यावरून अलगद फिरणारी वाऱ्याची झुळूक मनातील थकवा क्षणात दूर करते. भगवा आणि गुलाबी रंगांचा हा अनोखा संगम सृष्टीने अजिंठ्यासाठी अंथरलेला मखमली गालिचाच वाटतो.

वर स्वच्छ निळे आकाश आणि खाली फुलांचा रंगीबेरंगी सडा — या दोन टोकांमधील निसर्गचित्र अजिंठ्याच्या सौंदर्याला वेगळीच उंची देते. एका बाजूला मानवाच्या अजरामर कौशल्यातून साकारलेली प्राचीन लेणी आणि दुसऱ्या बाजूला ऋतूच्या क्षणभंगूर फुलांची दुनिया, यांचा अपूर्व मेळ पाहणाऱ्याचे डोळे आणि मन दोन्ही तृप्त करून जातो.

काळ्या पाषाणात कोरलेल्या कलेला निसर्गाच्या सळसळत्या रंगांची लाभलेली साथ हा अनुभव केवळ या ऋतूतच अनुभवता येतो. त्यामुळे पर्यटकांसाठी आणि निसर्गप्रेमींसाठी अजिंठा घाट सध्या आकर्षणाचा केंद्रबिंदू ठरला आहे.

फोटो ओळ, 

रंगीबेरंगी फुलांनी नटलेला अजिंठा घाट; निसर्गाच्या मुक्त उधळणीचे मोहक दृश्य.